poesia di Isaia Bonetti
El ciél su ‘n sasso
‘Na corte ‘mpaltanà
mai desmentegà
quatro vache ‘n stala
‘na pegora ‘na cavala
nela cuna tacà ai trai
‘nfassè driti come pai
ogni ano en nadàl
nel corgo ‘l scagagnàl
soto le coerte nel camaron
i buratini dedrio al tendon
la scuninarola sula siresara
el cesso sula luamara
le galine che fa l’oo
egni drento che gh’è stroo
‘nzenocion sula carega
tuti i sbàcia fin che i prega
el casoto del porsèl
acqua de posso nel cassirèl
la farina nel casson
tutti drento ‘n del brenton
lune vecie e lune noe
la léssia nel parol che boe
péna de oco nela foreta
el polinàr con la scaleta
el gato che ciàpa i rati
el formento par i frati
panoce da descartossàr
soto la pèrgola a becolàr
la caponàra dei cunei
grata i pioci nei cavéi
el foràgio che se séca
le ortìghe che le béca
botole de paia, canoti
cioca marso, bussoloti
ci toca toca, tua… soto ti
cica sù… con ti no zugo pì
la forca piantà nel fén
par canalete dai che ‘ndén
viole da far un masso
el ciel schissà sù ‘n sasso
le nebie la sguassa la bruma
i grii le rane le stéle la luna
buteleti... no i ghè mai!
a sbrindolon a far zavài
ci gh’è drento e ci gh’è fora
te coro ‘drio co’ la spassaora
sentarìn dela madona
tri pateravegloria se perdona
el stupacùl la marandéla
tira fora i corni bogonéla
bòcia mostàcia màcia patéla
el totorotò tortor nel torototèla
pié par tera a mostàr l’ùa
brassadèla sula stua
i moccoli ’nde ’n canton
i codeghìni ‘n pingolon
lardo sonza tri porselìni
a tan bus zero gatini
bàu sete quanti ‘n coa
contemene una noa
se s-cianco s-cenco s-cioca
moràr che ‘ngiassa s-ciopa
ve la conto ve la digo
co’ ‘l dialeto me destrigo
rugolo sbarossàia èrpego
i gnài ‘n fila soto ‘l pòrtego
misso onto ‘nfrusinà caluzeno
asse usso cadenasso ruzeno
panàra mescola moscarola
corni muso piéto primarola
piera vera sìgureto soco
seciàr buso versor slòto
catalpare rubinari sòche
‘na stradèla piena de poce
a scola grombialìn e camina
late e panbiscoto de matina
la pana che va de sora
boasse buganse candelòra
ririalso salti nela péga
nasse el vedèl, no’ se spiega
sossole sèssola figarola
spìni ave roari sìgagnola
la rebalsa sù par le scale
santagnìni usèrtole sdinsàle
scaesagne alzari coramele
spaghi fil de fèr stropeséle
verze frusche fazoi bìne
seolòti anése busi de topìne
polenta brustolà e salame
le gruste nel stagnà de rame
minestron de orto par disnàr
mandrìgoli dai busi del solàr
S. Lussia el campanèl
ogni ano sempre quél
tri pomi e ‘na naransa
erba sèna, mal de pansa
legna de stèle e de fassìna
el prèo con la scaldìna
el mus-cio nel presepio
el giasso drento al sécio
olta l’acqua sù l’usàra
l’è la storia de l’Uselàra
che va avanti a S.lorenzo
da vecio piassè ghe penso
è passà la fola pìassè bela
l’è tuto l’oro che g’ò ‘n scarséla
bonìn bonano bone feste
boni caponi bone minestre!
Post
0 commenti
Posta un commento